ព្រោះតែការភ័យខ្លាចនឹងជំងឺកូវីដ១៩ ដែលកំពុងបានមានកំណើនរាលដាលនៅកម្ពុជា លោកឧបនាយករដ្ឋមន្ត្រី ស ខេង រដ្ឋមន្ដ្រីក្រសួងមហាផ្ទៃ បានធ្វើការអំពាវនាវ ទៅដល់ប្រជាពលរដ្ឋខ្មែរទាំងអស់ថា កុំមានការរើសអើងបក្ខពួក និងពណ៌សម្បុរ ចំណែកអ្នកបង្ហោះព័ត៌មានមិនពិត ជុំវិញបញ្ហា កូវីដ-១៩ នឹងត្រូវទទួលខុសត្រូវមុខច្បាប់ជាមិនខាន។

លោកឧបនាយករដ្ឋមន្ត្រី មានប្រសាសន៌បែបនេះ នៅថ្ងៃទី២០ ខែមីនា ឆ្នាំ២០២០ ក្រោយបញ្ចប់កិច្ចប្រជុំ ស្ដីពី វិធានការណ៍ការពារជំងឺកូវីដ-១៩ នៅទីស្ដីការក្រសួងមហាផ្ទៃ ដោយរូបលោកឧបនាយករដ្ឋមន្ត្រី ស ខេង បានមាន ប្រសាសន៍ថា នាពេលកន្លងមករាជរដ្ឋាភិបាល ក៏បានធ្វើការណែនាំដល់ប្រជាជនកម្ពុជា មិនត្រូវបែងចែកជាតិ សាសន៍ឡើយ ជាពិសេសមិនត្រូវរើសអើង ចំពោះគ្នាផងដែរ ។

តាមប្រសាសន៍របស់លោកឧបនាយករដ្ឋមន្ត្រី បានលើកឡើងថា ប្រមុខរាជរដ្ឋាភិបាល លោកបានណែនាំថា មិន ត្រូវចែកខ្មែរឥស្លាម ខ្មែរនេះ ខ្មែរនោះទេ គឺទាំងអស់សុទ្ធតែជាខ្មែរដូចគ្នា ។ ក្នុងសេចក្ដីណែនាំរបស់ក្រសួងមហាផ្ទៃ ទៅតាមខេត្តបញ្ជាក់ចំណុចនេះផងដែរ គឺថា មិនត្រូវរើសអើងទេ ហើយមិនត្រឹមខ្មែរឥស្លាមទេ ជនជាតិណាក៏ដោយ ដែលបានមកម្ពុជា ជួបបញ្ហានឹង(កូវីដ-១៩) យើងក៏មិនត្រូវរើសអើងដែរ ។

សម្ដេចក្រឡាហោមបន្ដថា ដូចខ្ញុំបានបញ្ជាក់ថា នៅក្នុងពេលហ្នឹង ដែលសាកលលោកទាំងមូល កំពុងតែសាមគ្គីគ្នា ដើម្បីទប់ស្កាត់ជំងឺនឹង(កូវីដ-១៩) ហើយខ្មែរយើងក៏ដូចគ្នាដែរ។ ខ្ញុំនៅបន្ដអំពាវនាវថា ទុកដាក់ផលប្រយោជន៍បុគ្គល ដោយឡែកទៅផលប្រយោជន៍ ក្រុមបក្ខពួក និងពណ៌សម្បុរដោយឡែកសិនទៅដើម្បីរួមគ្នាសិន » ។

ស្របពេលនោះផងដែរ លោកឧបនាយករដ្ឋមន្ត្រី ស ខេង លើកឡើងថា ចំពោះអ្នករិះគន់រាជរដ្ឋាភិបាល តាមបែប ប្រជាធិតេយ្យ រដ្ឋាភិបាលស្វាគមន៍ និងទទួលយក។ ជាពិសេស អ្នករិះគន់ រដ្ឋាភិបាល និងបង្ហោះព័ត៌មានមិនពិត ជុំវិញបញ្ហាកូវីដ-១៩ នាំឲ្យច្របូកច្របល់សង្គមជាតិ នឹងទទួលខុសត្រូវចំពោះមុខច្បាប់ផងដែរ ៕