ប្រជាពលរដ្ឋជនជាតិដើមភាគតិច ជនជាតិព្នង នៅភូមិក្បាលរមាសថ្មី ឃុំក្បាលរមាស ស្រុកសេសាន ខេត្តស្ទឹង ត្រែង បានសម្រេចបិទផ្លូវចូលភូមិ តាមប្រពៃណីជនជាតិដើមភាគតិចរបស់ខ្លួន ចាប់តាំងពីថ្ងៃទី២៣ ខែមីនា ឆ្នាំ ២០២០ រហូតដល់ថ្ងៃទី៣០ ខែមីនា ឆ្នាំ២០២០ ពោលរយៈពេល ៧ថ្ងៃបានទើបបើកវិញ។ ការធ្វើរបស់បងប្អូន ជនជាតិដើមភាគតិចបែបនេះ ក្នុងគោលបំណងទប់ស្កាត់ជំងឺ COVID-19 ស្របពេលដែលប្រទេសកម្ពុជា កំពុងតែ រាត ត្បាត ដោយវីរុសកាចសាហាវមួយនេះ។

លោក រឿន សម្បត្តិ ដែលជាមេឃុំក្បាលរមាស បានប្រាប់ថា ការបិទភូមិនេះ គឺប្រជាពលរដ្ឋ និងជនជាតិដើមភាគតិច ជនជាតិព្នង បានរៀបចំធ្វើឡើងក្នុងគ្រាមានអាសន្ន ឬក៏មានអាសន្នរោគ និងជំងឺឈឺថ្កាត់នៅក្នុងភូមិ ដែលពួកគេតែងតែធ្វើពិធីបុណ្យភូមិ ហើយបន់ស្រន់ អារ័ក្សអ្នកតា រួចហើយពួកគេក៏នាំគ្នាបិតផ្លូវតែម្ដង ការតំ ណមមិនឱ្យមនុស្សចេញចូល រយៈពេល ៧ថ្ងៃ។

ក្នុងករណីដែលមានមនុស្សម្នាក់ចេញចូល គេត្រូវផាកពិន័យ ហើយមិនមានករណីលើកលែងចំពោះអ្នកភូមិ ដែលចេញចូលមិនឱ្យរំលងអាធ្រាត្រ បើអ្នកភូមិមួយណាសេរី គឺមេកន្ទ្រាញត្រូវតែកាត់ការចោល ។

ក្នុងនោះដែរ លោក សុវណ្ណ ពិសិដ្ឋ អភិបាលស្រុកសេសាន បានសម្ដែងការសោកស្ដាយ ដែលអ្នកភូមិក្បាលរមាស ប្រកាន់នូទំនៀមទំលាប់ជនជាតិដើមភាគតិច ហើយផាកពិន័យទៅលើជនចំណាកស្រុកថ្លៃពេក។ ក្នុងករណីដែលជនចំណាកស្រុក អត់យល់ដឹងអំពីប្រពៃណីពួកគាត់ ហើយចូលទៅក្នុងភូមិត្រូវបានអ្នកភូមិពិន័យរហូត ៧០ ម៉ឺនរៀល ។

លោកបញ្ជាក់ថា លោកនឹងអញ្ជើញមេកន្ទ្រាញ និងមេភូមិទាំងអស់ធ្វើការអប់រំណែនាំបន្ថែមទៀត ដើម្បីបើកផ្លូវឱ្យបងប្អូនប្រជាពលរដ្ឋផ្សេងទៀត ដែលរកស៊ីតាមក្នុងភូមិ និងតំបន់របស់ខ្លួន ធ្វើដំណើរចូលធម្មតា។

មហាជនជាច្រើន ដែលកំពុងតាមដាននូវសកម្មភាពបងប្អូនជនជាតិដើមភាគតិចនេះ បានសំដែងនូវការព្រួយបារម្ភថា ចុះប្រសិនបើអ្នកភូមិមានករណីកើតជម្ងឺកាចសាហាវ អាជ្ញាធរ ឬក៏គ្រូពេទ្យអាចចូលជួយយកអាសារ ពួកគាត់ក្នុងភូមិយ៉ាងម៉េចទៅ បើពួកគាត់ប្រកាន់តំណមបែបនេះ ៕