ថ្មីៗលេចធ្លាយរឿងរ៉ាវដ៏សែនចាប់អារម្មណ៌មួយ ខណៈដែលរូបស្ត្រីម្នាក់ ដែលគេស្គាល់ថា ជាកូនស្រីរបស់តំ ណាងរាស្ត្រមួយរូប បានមកឈរនៅមុខគ្រឿងចក្រ ដែលកំពុងឈូសសំអាតដី ។ ស្ត្រីរូបនោះបានអះអាងថា ដីនោះជាដីរបស់ខ្មោចម្តាយខ្លួន ហើយមិនអនុញ្ញាតឲ្យមានសកម្មភាពឈូសឆាយនោះឡើយ ។

ហេតុការណ៍នេះកើតឡើងនៅវេលាម៉ោង ១០ និង០០នាទី នៅក្នុងថ្ងៃទី០៨ ខែមិថុនា ឆ្នាំ២០២០ ម្សិលមិញនេះ ដែលស្ថិតនៅក្នុងតំបន់អភិវឌ្ឍន៍សេដ្ឋកិច្ចផ្សារថ្មី ក្នុងភូមិពូលូង សង្កាត់រមនា ក្រុង សែនមនោរម្យ ខេត្ត មណ្ឌលគីរី ។

ម្ចាស់ដីកម្មសិទ្ធិ ត្រូវបានគេស្គាល់ថា លោក កែវ សារ៉ាន់ បានយកឯកសារ និងរៀបរាប់ឲ្យដឹងថា ក្នុងទីតាំង ដីដែលរូបលោកត្រូវធ្វើការអភិវឌ្ឍន៍នេះ គឺរូបលោកបានទិញពីឈ្មោះ ឌុច សុផាត គឺតាំងតែពីឆ្នាំ ២០០៧ មកម៉្លេះ ដោយមានទាំងរដ្ឋអំណាចភូមិឃុំ និងស្រុក ស៊ីញ៉េដឹងឮទៀតផង ពោលគឺរូបលោកបានបំពេញ បែបបទតាមច្បាប់រយៈពេលជាង១០ឆ្នាំមកហើយ ។

លោកបានបញ្ជាក់ថា នៅក្នុងឆ្នាំ២០២០នេះ រូបលោកត្រូវធ្វើការកែលំអរទីតាំងដី ដោយយកគ្រឿងចក្រមក ឈូសសំអាត ស្រាប់តែត្រូវបានស្រ្តី ដែលគេស្គាល់ថា ជាកូនស្រីតំណាងរាស្ត្រ បានធ្វើការរារាំងហាមឃាត់ មិនឲ្យគ្រឿងចក្រឈូសសំអាតដី ដោយរូបស្ត្រីនោះ អះអាងថា ជាដីរបស់ ខ្មោចម្ដាយខ្លួន ។

ស្ត្រីរូបនោះ គ្មានលិខិតស្នាមអ្វីបញ្ជាក់នោះទេ ប៉ុន្តែខ្លួនគាត់បានយកខ្មោចម្តាយមកសំអាង ហើយអះអាងថា
ឯកសារនៅក្នុងទូររបស់ខ្មោចម្តាយ ហើយបើតាមទំនាមទំលាប់ជនជាតិ មិនឲ្យគាស់បើកទូរមើលនោះ ទេ ព្រោះជាតំណមរបស់ជនជាតិដើម ភាគតិច ព្នង ។

លោក កែវ សារ៉ាន់ បានបន្តថា ចប់ស្រេចហើយ បើស្រ្តីម្នាក់នោះ គាត់យកហេតុផលចឹងមកសំអាង ផ្ទុយពី ផ្លូវច្បាប់ ម្យាងទៀតនោះ រដ្ឋអំណាច ភូមិ ឃុំ និងអាជ្ញាធរស្រុក ពួកគាត់ក៏មិនបានដឹងឮផងនោះ អញ្ចឹងហើយ ការអភិវឌ្ឍន៌របស់លោក ត្រូវខាតបង់លុយជាច្រើននោះ ហើយតើអ្នកណាជាអ្នកទទួលខុសត្រូវ ។

ប្រជាពលរដ្ឋនៅក្នុងក្រុងសែនមនោរម្យ សូមសំណូមពរ ដល់លោក ស្វាយ សំអ៊ាង ក្នុងនាមរូបលោកជាអភិបាល នៃគណៈអភិបាលខេត្ត មណ្ឌលគិរី សូមមេត្តាជួយមានចំណាត់ការ ផ្តល់យុត្តិធម៌ តាមគតិយុត្តិឲ្យបានច្បាស់ លាស់ បង្ហាញមហាជនឲ្យឃើញផង ជៀសវាងភាពរញ៉េរញ៉ៃ ក្នុងខេត្ត នៅថ្ងៃខាងមុខ ៕