គិតមកត្រឹមថ្ងៃទី១៧ ខែវិច្ឆិកា ឆ្នាំ២០២១ អ្នកទោសដែលបានប្រើយុទ្ធសិល្ប៍ហែកគុក រត់គេចខ្លួនបានសម្រេចកាល ពីពេលកន្លងទៅ នៅពេលនេះ ត្រូវបានសមត្ថកិច្ចក្របួចយកមកវិញបានអស់ហើយ នេះបើតាមព័ត៌មានដែលអង្គ ភាពព័ត៌មានយើងទទួលបាន កាលពីពេលថ្មីៗនេះ ។

តាមដែលសេចក្តីរាយការណ៌បានប្រាប់ឲ្យដឹងថា អ្នកទោសចំនួន២នាក់ក្នុងចំណោមអ្នកទោស៧នាក់ ដែលបាន ហែកគុករត់គេចខ្លួនកន្លងទៅ នៅពេលនេះត្រូវបានសមត្ថកិច្ចក្របួចបានយកមកវិញហើយ ហើយជាក់ស្តែងការ ក្របួចបានអ្នកទោស២នាក់បន្ថែមនេះ គឺបានគ្រប់ចំនួន៧នាក់ដែលពួកគេបានរត់គេចខ្លួន កាលពីពេលកន្លងទៅ
គិតត្រឹមវេលាម៉ោង១១ និង១០នាទីថ្ងៃទី១៧ ខែវិច្ឆិកាឆ្នាំ២០២១ នៅចំណុចភូមិកោះហឹប ឃុំអូរស្វាយ ស្រុកបូរី អូរស្វាយសែនជ័យ ខេត្តស្ទឹងត្រែង ។

លោក សេង សំអាន មេបញ្ជាការកងរាជអាវុធហត្ថស្រុកថាឡាបរិវ៉ាត់ បានឲ្យដឹងថា គិតត្រឹមវេលាម៉ោង១១ និង ១០នាទីថ្ងៃទី ១៧វិច្ឆិកា ឆ្នាំ២០២១ កម្លាំងអាវុធហត្ថ បានសហការណ៍ ជាមួយកម្លាំងយោធា កម្លាំងនគរបាល និង កម្លាំងអនុរក្សពន្ធនាគារ បានចាប់អ្នកទោសចំនួន២នាក់ទៀត ដែលជាចំនួនអ្នកទោសចុងក្រោយ ពោលគឺក្រុម អ្នកទោសដែលធ្វើសកម្មភាព ហែកគុកកាលពីយប់ឈានចូលថ្ងៃទី៨ ខែវិច្ឆិកា ឆ្នាំ២០២១ ទាំង៧នាក់ យកមកវិញ អស់ហើយ ។

អ្នកទោសទាំង២នាក់ដែលត្រូវចាប់ខ្លួនបានមកវិញចុងក្រោយនេះ មានឈ្មោះ ឡាវ៉ាន់ កាវង់ផេង និងម្នាក់ទៀត មានឈ្មោះ សៀន ខន ។

លោកមេបញ្ជាការបានបញ្ជាក់ថា បន្ទាប់ពីទទួលព័ត៌មានកាលពីយប់ថ្ងៃទី១៦ វិច្ឆិកា ឆ្នាំ២០២១ មានតម្រុយអ្នក
ទោសចំនួន២នាក់បានលួចទូកអ្នកភូមិជិះសំដៅទៅចំណុចកោះហឹប កម្លាំងរបស់លោក និងកម្លាំងសមត្ថកិច្ច សហការណ៍ក៍បានតាមប្រដេញ និងប្រទះឃើញដានជើង លុះដើរតាមដានជើងនោះ ក៍ប្រទះឃើញភ្នក់ភ្លើង អ្នកទោសទាំង២នាក់នោះ ដុតត្រយូងចេកហូប ក្រោយមកទើបបន្តតាមទៀត អ្នកភូមិរាយការណ៍ថា ពួកគេបាន ដកដំឡូង ក្នុងចំការរបស់គេដុតហូប ទើបកម្លាំងសមត្ថកិច្ចធ្វើការឡោមព័ទ្ធ ចាប់ខ្លួនបានទាំង២នាក់តែម្តង។

គួរបញ្ជាក់ថា នេះគឺជាស្នាដៃមួយរបស់កម្លាំងសមត្ថកិច្ច ដែលខិតខំព្យាយាមខ្នះខ្នែងស្វែងរកក្រុមអ្នកទោសហែក គុក រហូតទទួលបានលទ្ធផលជោគជ័យ គួរឲ្យកើតសសើរ ៕