សេចក្តីរាយការណ៌មួយបានប្រាប់ឲ្យកម្មវិធីផ្សាយព័ត៌មានយើងដឹងថា នៅព្រឹកថ្ងៃទី២៩ ខែមិថុនា ឆ្នាំ២០២១នេះ
ឈើជាច្រើនដុំចាប់ផ្តើមដំណើរការដឹកឲ្យកក្រើកព្រៃតែម្តង តាមរម៉កម៉ូតូកែឆ្នៃដែលគេបានដឹងថា អាចផ្ទុកបាន ច្រើនសម្បើមជាងរថយន្តដឹកទំនិញ ស្ថិតនៅចំណុចច្រក១០៥ ជាប់ទៅនឹងទីស្នាក់ការរដ្ឋបាលព្រៃឈើ ក្នុងឃុំ កន្ទួត ស្រុកចិត្របុរី ខេត្តក្រចេះ ។

សេចក្តីរាយការណ៌នោះបានបន្តថា ឈើដឹកតាមរម៉កកែឆ្នៃដែលបានដំឡើងទ្រុងដ៏ធំនោះ គឺជារបស់មេឈ្មួញ ម្នាក់ឈ្មោះ ធី ដោយគេស្គាល់យ៉ាងច្បាស់ថា ជាជើងខ្លាំងខាងរកស៊ីបទល្មើសឈើខុសច្បាប់ដុះស្លែជាយូរឆ្នាំណាស់ មកហើយ ក្នុងនោះបើទោះជាឈ្មួញឈើដ៏ទៃត្រូវបានសមត្ថកិច្ចជំនាញពាក់ព័ន្ធធ្វើការបង្ក្រាបយ៉ាងណា ក៏ដោយ នោះ សម្រាប់បុគ្គលមេឈ្មួញឈើដុះស្លែឈ្មោះ ធី នេះ គឺហាក់មានសេចក្តីសុខយ៉ាងល្អណាស់ជាងគេខ្លាំងណាស់ ដែលក្លាយជាការលើកឡើងពីពលរដ្ឋជាច្រើននិយាយតៗគ្នាថា ឈ្មួញឈើឈ្មោះ ធី នេះ ប្រហែលជាមានអ្នក មានអំណាចក្នុងខេត្តនៅពីក្រោយហើយមើលទៅ ទើបឈ្មួញម្នាក់នេះ មិនត្រឹមតែអាចរកស៊ីបានយ៉ាងរលូនខុស ពីឈ្មួញឈើដ៏ទៃនោះទេ ហើយថែមទាំងបោះសម្តីថា គ្មានអ្នកណាធ្វើអីខ្លួននោះឡើយ ។

សេចក្តីរាយការណ៌នោះបន្តថា ឈើដែលឈ្មួញឈ្មោះធី កំពុងតែកាក់កបរកស៊ីនេះ គឺជាប្រភេទឈើ សុក្រំ ក្លុម និងបន្ទះផែ ដោយដឹកចេញពីទឹកដីខេត្តមណ្ឌលគិរី ឆ្លងកាត់ មកច្រក១០៥ ចូលក្នុងទឹកដីខេត្តក្រចេះ ដោយដឹកចូល យ៉ាងមានក្តីសុខក្នុងសង្កាត់រដ្ឋបាលព្រៃឈើកន្ទួត ប្រចាំស្រុកចិត្របុរី ក្រោមការគ្រប់គ្រងរបស់លោក ឃ្លាំង ណារ័ត្ន ដែលគេតែងល្បីថា ឲ្យតែមេព្រៃដាក់ប៉ុស្តិ៍កន្លែងណា គឺអស់ព្រៃឈើកន្លែងហ្នឹងហើយ ។

ពលរដ្ឋជាច្រើនបានលើកឡើងថា មេឈ្មួញឈើឈ្មោះ ធី នេះគឺបានដឹកឈើជាប្រចាំ ស្ទើរតែរាល់ថ្ងៃ ហើយ បើចំណែកសមត្ថកិច្ចជំនាញវិញ គឺគេដឹងថា បណ្តាក់គ្នា ដាក់គោលដៅឈរជើងដូចខ្យង ប៉ុន្តែចំណាត់ការលើ ឈ្មួញឈ្មោះ ធី នេះវិញគឺសមត្ថកិច្ចមួយៗ ហាក់បីដូចជាត្រូវថ្នាំសណ្តំឈ្មួញឈើ គឺមិនរវីរវល់ ស្ពឹកស្រពន់ លែង និយាយ លែងស្តីសោះតែម្តង ។

ទោះជាបែបណា ប្រជាពលរដ្ឋជាច្រើនសំណូមពរដល់អស់លោកថ្នាក់ដឹកនាំខេត្តក្រចេះទាំងអស់ សូមមេត្តា ជួយមានចំណាត់ការអើពើជាមួយបុគ្គលឈ្មោះធី ដែលជាមេឈ្មួញឈើជើងខ្លាំងនេះផង ព្រោះរាល់ថ្ងៃនេះកាន់ តែលេចធ្លាយល្បីខ្លាំងណាស់ថា ឈ្មួញឈើដ៏ទៃអស់លោកជំនាញបង្ក្រាប ដោយឡែកតែឈ្មួញឈើឈ្មោះ ធី សង្ស័យសមត្ថកិច្ចជំនាញត្រូវថ្នាំសណ្តំខ្លាំងហើយមើលទៅ ទើបស្ថាប័នមួយៗរក្សាភាពស្ងៀមស្ងាត់ឲ្យសូន្យរលូន
ល្អយ៉ាងចឹង ៕